Pantun Covid19 Sehat Ihsan Sadiqin

Pantun Covid19 Sehat Ihsan Sadiqin
Sehat Ihsan Sadiqin

Ta'eun Corona
Sehat Ihsan Sadiqin:


Assalamualaikum ban mandum kawôm
Pujo keu rabbôn phôn awai mula
Seulaweut saleuëm teuma tasanjông
Ateuh pang ulèë Rasul ambiya

Ta'eun Corona ca-é lôn susôn
Peunyakét phôn-phôn lahé di China
Jino meusipreuk kuta ngon dusôn
Abeh jipeurôn ban sigom dônya

Nibak binatang dilèë asai phôn
Pinah Corona bak manusia
Ka batôk beursén napah ji ék trön
Leuhnyan rakan lôn ajai pih teuka

Dum maté ureuëng geuwo bak rabbôn
Lakoë ngon binô pisah seulama
Aneuk miet cucut di dalam ayôn
Dum bandum kawôm jino ka rasa

Ta'eun Corona mudah meusambông
Bagah that ditrön bak ureuëng lingka
Lheuh mumat jaroë tamat boh idông
Langsông meusambông peunyakét teuka

Ta'eun Corona cukôp that paloë
Hana ditusoë tuha ngön muda
Teungku malém ngen ureuëng bangsat
Bandum jihajat lé te'eun Corona

Hana dikalön kulét ngon nanggroë
Bandum nyan saban nibak Corona
Peu-peu Agama hana dipakoë
Pijuët meuasoë peusama rata

Wahé e rakan di dalam nanggroë
Bèk taanggap droë keubai Corona
Wajéb saboh kheun ngen ureuëng bumoë
Tapeujiôh droë dari Corona

Na siat watèë tarah lé jaroë
Kadang na di duëk ta'eun Corona
Bèk that taduek rap ngen ureuëng baroë
Tadöng bak jarak jiôh sideupa

Bèk ban meurumpôk tamumat jaroë
Hana meukureung nilai syèëdara
Bèk peugot tumpôk dum rata sagoë
Sinan keuh mudah ta'eun menyeuba

Bèk tat le taduëk di dalam warông
Ngen kupi pancông dalam glah kaca
Peulom tapakat ureung meurôn-rôn
Jak nonton mancông idoeng India

Wahé e rakan lôn beu sajan hajat
Tajaga harkat umat manusia
Besapeu kheun beu saban pakat
Nyan ta'eun laknat bagah binasa

Ta ikhtiyeu sabé hai rakan
Bèk teuwo teuma tapanjat doa
Moga Allah bri dum keumudahan
Tanyoë seulamat dari Corona

Oh Ya Allah oh ya Tuhanku
Neu puwèh laju ta'eun Corona
Bit kamoë la'eh oh ya Tuhanku
Bacut tan mampu lawan Corona

Ôh no keuh ca-e nyo ulôn karang
Meu'ah hai rakan dum ulôn pinta
Kadang na salah bak lôn keumarang
Maklum hai taulan lôn mantong muda

April 2020

Dr. Sehat Ihsan Sadiqin, peneliti dan dosen UIN Ar-Raniry Banda Aceh ini alumni S3 Studi Pemikiran Islam, UIN Sunan Kalijaga, Yogyakarta. Buku-buku karyanya yang telah terbit; Dialog Tasawuf dan Psikologi (Ar-Raniry Press, 2004), Tasawuf Aceh, Banda Aceh (Bandar Publishing, 2008) Kosmosufism: Islam antara Imajinasi Metafisis dan Realitas Kehidupan Sosial (Ar-Raniry Press, 2013) Abu Habib Muda Seunagan, Republiken Sejati dari Aceh, Banda Aceh (Bandar Publishing, 2015). 

Mantan mahasiswa S3 Antropologi Budaya, Universitas Degli Studi di Milano-Bicocca, Milan, Italia, kini tercatat sebagai anggota FKDM Aceh. IG. @sehat.ihsan

Komentar

Loading...